• Call Us
  • +25146 2206572

በውጤት ተኮር እቅድ ዝግጅት ትግበራና ምዘና ዙሪያ ስልጠና ተሰጠ፡፡

hossan BSC Traninigበደ/ብ/ብ/ህ/ክ/መንግስት የሳይንስና ኢንፎርሜሽን ቴክኖሎጂ ቢሮ ከዞንና ከልዩ ወረዳ ለተወጣጡ የልማት እቅድና ሰው ሀብት ባለሙያዎች በውጤት ተኮር እቅድ ዝግጅት ትግበራ የምዘና ማንዋልና ተሻሽሎ በተዘጋጀው የሰው ሀብት አፈጻጸም መመሪያዎች ላይ በሀዲያ ዞን በሆሳዕና ከተማ ስልጠና ሰጠ፡፡ የስልጠናውን ዋና አላማ አስመልክተው በውጤት ተኮር እቅድ ዝግጅት ትግበራ ምዘና ማንዋል ላይ ሥልጠና የሰጡትና የሳ/ኢ/ቴ/ቢሮ የእቅድና በጀት ዝግጅት ክትትልና ግምገማ ዳይሬክቶሬት ዳይሬክተር የሆኑት አቶ ከንባታ ካዌ እንደገለጹት በሪፎርም አጠቃቀም ላይ ስለሚስተዋሉ ችግሮች የመፍትሄ አቅጣጫ በጋራ ውይይት በማድረግ ወጥ የሆነ ግንዛቤ በመያዝ ወደሥራ መገባት እንዳለበት ገልጸው ይህ ተሻሽሎ የቀረበው ሰነድ የአፈጻጸም ስራ አመራር ምንነትና ሚዛናዊ የውጤት ተኮር እቅድን በመገንዘብ የእቅድ ትግበራ፣ የአፈጻጸም መረጃ ሪፖርት ግብረ መልስና ግምገማ የምዘና ውጤት አሞላል ግልጽ በሆነ መንገድ በማከናወን የተሻለ አፈፃፀም ላላቸው እውቅናን በመስጠት አፈፃፀማቸው ወደኋላ የቀሩትን ወደመስመር በማስገባት ሥራዎችን መሰራት መሆኑን ገልጸዋል፡፡ በመቀጠልም ተሻሽሎ በተዘጋጀው የሰው ሀብት የአፈጻጸም መመሪያዎች ላይ ሥልጠና የሰጡትና የሳ/ኢ/ቴ/ቢሮ የሰው ሀብት አስተዳደር ልማት ዳይሬክቶሬት ዳይሬክተር የሆኑት አቶ በቀለ አራርሳ የስልጠናውን ሰነድ ባቀረቡበት ወቅት እንዳሉት የደቡብ ክልል መንግስት ፐብሊክ ሰርቪስ የሰው ሀብት ቢሮ በየደረጃው በሚገኙ የመንግስት ተቋማት የሚሰጠውን የሰው ሀብት ስራ አመራር ቀልጣፋ፣ ውጤታማና ለአሰራር ምቹ እንዲሆን ለማስቻል በርካታ የአሰራር ስርዓቶችን በማውጣትና ግንዛቤ በመፍጠር በስራ ላይ እንዲውል እያደረገ ይገኛል፡፡ ቀደም ሲል ስራ ላይ የነበሩትን መመሪያዎች መፈተሽና ማሻሻል አስፈላጊ ሆኖ በመገኘቱ ፍትሀዊ፣ ቀልጣፋና ለአሰራር ምቹ የሆኑ የዲሲፕሊንና የቅሬታ አቀራረብን፣ ቅጥርን፣ ዝውውርንና የደረጃ እድገትን በተመለከተ የአፈጻጸም ስርአትን በመዘርጋት በመንግስት መስሪያ ቤቶችና በሰራተኛው መካከል ጤናማ የስራ ግኘኙነት እንዲኖር ለማድረግ የሚረዳ ሰነድ ስለሆነ በወሰዳችሁን ስልጠና ልክ ስራችሁን በአግባቡ ማከናወን አለባችሁ ብለዋል፡፡ በመጨረሻም በቀረበው ሰነድ ላይ የስልጠናው ተሳታፊዎች ላነሱት ለተለያዩ ጥያቄዎች ምላሽ ከተሰጠና ውይይት ከተደረገ በኋላ ሁሉም ሰልጣኝ ወደሥራ ገበታው ሲመለስ በተቀመጠው እስታንዳርድ መሰረት ሥራውን አቅዶ በመስራትና ወጥነት ያለው ሪፖርት በማቅረብ ለተቋሙ ግብ ስኬት የበኩሉን ሊወጣ እንደሚገባና በጋራ መስራት እንዳለባቸው በመግለጽ ሥልጠናውን አጠናቀዋል፡፡