• Call Us
  • +25146 2206572

የወረዳኔት መሣሪያዎችን በአግባቡ ለመያዝና ለመጠቀም ባለሙያዎችን ማብቃት አማራጭ የለውም ተባለ፡፡

Weredanet Traningበደ/////መንግስት ሳይንስና ኢንፎርሜሽን ቴክኖሎጂ ቢሮ በቴክኖሎጂው ዘርፍ የሚቀርቡ አገልግሎቶች የተቀላጠፉና ቀጣይነት እንዲኖራቸው አቅጣጫ አስቀምጦ እየተንቀሳቀሰ መሆኑ ይታወቃል፡፡  ስለሆነም እስከታችኛው መዋቅር ያሉ የኢኮቴ ባለሙያዎች ያለባቸውን የዕውቀት ክፍተት በመሙላት በቴክኖሎጂው ዘርፍ የሚሰጡ አገልግሎቶችን በተገቢው ሁኔታ መስጠት እንዲችሉ  ዋና ዓላማው አድርጎ እየሠራ ይገኛል፡፡ ይሁን እንጂ እስከወረዳ የተዘረጋው የወረዳኔት መሣሪያዎች በተለያዩ ችግሮች ምክንያት ለታለመለት ዓላማ እየዋሉ ባለመሆናቸው መንግስት አላስፈላጊ ለሆኑ ወጪዎች  እየተዳረገ ነው፡፡

ስለዚህ የወረዳኔት መሣሪያዎችን በአግባቡ ይዞ በመጠቀም እነዚህን አላስፈላጊ ወጪዎች ለመከላከልና ሀገራዊ ልማትን ለማፋጠን እስከታችኛው መዋቅር ያሉትን የኢኮቴ ባለሙያዎች ማብቃት አማራጭ የሌለው በመሆኑ በጉራጌ፣ ሸካ፣ ካፋ፣ ቤንች ሸኮና ምዕራብ ኦሞ ዞኖች ውስጥ ካሉ ወረዳዎች ለተወጣጡ የኢኮቴ ባለሙያዎች በቪዲዮ ኮንፍራንስ መሣሪያዎች፣ አይ. አድሬሲንግ (IP addressing) በኤ..ኤስ.ኤል(ADSL) ኮንፊግሬሽን እና ፋይል ዳይሬክተሪ፣ ኤክስቼንጅ ሜይልና የዙም አፕልኬሽን ምንነትና አጠቃቀምን አስመልክቶ ከቀን 17/09/2013. ጀምሮ ለሁለት ቀን በወልቂጤ ከተማ ሥልጠና ተሰጠ፡፡

የዚህም ሥልጠና የመጨረሻ ውጤት ባለሙያዎች ያለባቸውን የዕውቀት ክፍተት በመሙላት የተለያዩ ችግሮችን በራሳቸው አቅም ፈተው የሚጠበቅባቸውን አገልግሎት መስጠት ይሆናል ያሉትና ከሌሎች ባሙያዎች  (የአይቲ ሰኩሪቲ ኤክስፐርት ከሆኑት አቶ ቢኒያም ቄሬንሶ እና የቪዲዮ ኮንፍራንስ ባለሙያ ከሆነችው ከወ/ ማረፊያ ብርሃኑ) ጋር ሥልጠናውን የሰጡት በሳይንስና ኢንፎርሜሽን ቴክኖሎጂ ቢሮ ከፍተኛ ሲስተም አድምንስትሬተር የሆኑት አቶ መስፍን ግርማ እና የቴክኖሎጂ ስፔሻሊስት የሆኑት አቶ ኢስጢፋኖስ ጡራሞ  ገልጸዋል፡፡

ሥልጠናው ከተጠናቀቀ በኋላ በተደረገው ውይይት ላይ ሰልጣኞች የተሰጠን ሥልጠና እንደ ኢኮቴ ባለሙያ ምን እንደሚጠበቅብን አሳይቶናል፡፡ እንዲህ ዓይነት ሥልጠናዎች ቀጣይነት ቢኖራቸውና በታችኛው መዋቅር ያሉትን ሁሉንም የኢኮቴ ባለሙያዎች የሚያካትት ቢሆን ይመረጣል፡፡ይህ በእንዲህ እንዳለ ለጀማሪ ሰልጣኞች የስልጠናው ጊዜ በቂ ስላልሆነ ለወደፊቱ ቢታሰብ ጥሩ ነው፡፡ በሌላ በኩል በታችኛው መዋቅር ላይ የቴክኖሎጂውን ዘርፍ እንዲመሩ የተመደቡት አካላት የትምህርት መስመራቸው ከዘርፉ ጋር የማይገናኝ ስለሆነ የሚሰጡት ትኩረት እጅግ አናሳ ነው፡፡ ስለሆነም የክልሉ ሳይንስና ኢንፎርሜሽን ቴክኖሎጂ ቢሮ ይህ ችግር የሚቀረፍበትን መንገድ ቢያመቻችና ተገቢው ሥራ በአግባቡ እንዲሰራ ቢያደርግ ይመረጣል፡፡ ሲሉ ያላቸውን አስተያየት ሰጥተዋል፡፡

በመጨረሻም አቶ መስፍን ግርማ እና አቶ ኢስጢፋኖስ ጡራሞ ሥልጠናውን ሲያጠቃልሉ በክልሉ ሳይንስና ኢንፎርሜሽን ቴክኖሎጂ ቢሮ በዋናነት ከታቀዱ ተግባራት አንዱ እስከታችኛው መዋቅር ያሉ ለሙያዎችን በማብቃት ተገቢውን የቴክኖሎጂ አገልግሎት ለማህበረሰቡ መስጠት ነው፡፡ በሌላ በኩል በታችኛው መዋቅር ብዙ ተግዳሮቶች ቢኖሩም እኛ እጃችንን አጣጥፈን መቀመጥ ሳይሆን ከዚህ ሥልጠና ባገኛችሁት ዕውቀት ቴክኖሎጂው ያለውን ጥቅም በማሳየት ግንዛቤ መፍጠርና ሌሎች አካላትም እንዲደግፏችሁ ማድረግ ይኖርባችኋል፡፡ ቢሮውም ማድረግ የሚገባውን እገዛ ለማድረግ ዝግጁ ነው፤ ሲሉ ገልጸዋል፡፡