• Call Us
  • +25146 2206572

የዞኖችና ልዩ ወረዳዎች ጥያቄ የነበረው የማህበረሰብ ሬዲዮ ጣቢያ ማስፋፋት ጥያቄ ምላሽ አገኘ::

የደ/ቡ/ብ/ብ/ህ/ክ/መንግስት ሳይንስና ኢንፎርሜሽን ቴክኖሎጂ ቢሮ የማህበረሰብ ሬዲዮ ጣቢያዎችን የማስፋፋት ስራ ከፌደራል ኢኖቬሽንና ቴክኖሎጂ ሚኒስቴር ጋር በመተባበር እየሰራ መሆኑን ምክትል የቢሮ ኃላፊ የኢኮቴ ልማትና አስተዳደር ዘረፍ ኃላፊ አቶ ሀብታሙ ታረቀኝ አስታወቁ፡፡

ከዚህ ቀደም የክልሉ ሳይንስና ኢንፎርሜሽን ቴክኖሎጂ ቢሮ በወቅቱ መገናኛና ኢንፎርሜሽን ቴክኖሎጂ ሚኒስቴር መስሪያ ቤት ጋር በመተባበር 5 የማህበረሰብ ሬዲዮ ጣቢያዎችን አቋቁሞ የኮሬ፣ የካፋ፣ የከምባታ፣ የገሊላና የኡባ ደብረ ፀሀይ ማህበረሰብ ሬዲዮ ጣቢዎች የአካባቢዎቻቸውን ህብረተሰብ በማገልገል ላይ እነደሚገኙ ገልጸው የማህበረሰብ ሬዲዮ ጣቢያዎች የአካባቢውን ማህበረሰብ ወቅታዊ የመረጃ ልውውጥ ተጠቃሚ ከማድረግ ባሻገር ቋንቋቸውን፣ ባህላቸውንና አኗኗራቸውን ለማሳደግ ሚናው ከፍተኛ መሆኑን ተናግረዋል፡፡

በዘንድሮ የበጀት ዓመት የፌደራል ኢኖቬሽንና ቴክኖሎጂ ሚኒስቴር በመላ ሀገሪቱ ከሚያቋቁማቸው 13 የማህበረሰብ ሬዲዮ ጣቢዎች ለደቡብ ክልል የተሰጠውን የ3 ማህበረሰብ ሬዲዮ ጣቢያዎች ኮታ ከፊል የማቋቋሚያ መሳሪያዎች ርክክብ በ13/08/13 ዓ.ም ተከናዉኗል ፡፡

የደቡብ ክልል ሳይንስና ኢንፎርሜሽን ቴክኖሎጂ ቢሮ ከሚኒስቴር መስሪያ ቤቱ ጋር በጋራ መስፈርቱን አሟልተው ለተመረጡት ለሸካ፣ ለባስኬቶና ለወራቤ ማህበረሰብ ሬዲዮ ጣቢዎች መቋቋሚያ የሚሆኑ መሳሪዎችን ተረክቦ ለሶስቱም መዋቅሮች አስረክቧል፡፡ በቀጣዩ ዙር የቀሪዎቹ መሳሪዎች ርክክብ ይፈጸምና የጣቢዎቹ ተከላ ሲፈጸም ቀደም ብለው ከነበሩት የኮሬ፣ የከምባታ፣ የካፋ፣ የገሊላና የኡባ ደብረፀሀይ የማህበረሰብ ሬዲዮ ጣቢያዎች ጋር በክልሉ የሚኖሩትን የማህበረሰብ ሬዲዮ ጣቢያዎች ቁጥር ወደ 8 የሚሳድገው ይሆናል፡፡

የሬዲዮ ጣቢያ ለማቋቋም የሚያስፈልገውን ከፍተኛ ኢንቨስትመንት የክልል መንግስት ብቻውን ሊሸፍነው የማይችለው በመሆኑ ከሚኒስቴር መስሪያ ቤት ጋር በጋራ የሚሰራ ስራ በመሆኑ በቀጣይ እንደ ሀገር ከተያዘው ዕቅድ ላይ ለክልሉ በሚሰጠው ኮታ መሰረት ስራው ቀጣይነት የሚኖረውይሆናል፡፡ ሲሉ አቶ ሀብታሙ ታረቀኝ ገልጸዋል፡፡